O grupo provincial do Partido Popular acorda o reparto das áreas de goberno para facer un traballo “aproveitable e produtivo” para a provincia. Así o indica a voceira Elena Candia, quen manifesta se trata dunha distribución “pensada, tal e como dixemos, para fiscalizar o traballo do goberno” da Deputación, “que, por certo, é o que ten máis medios da historia, co obxectivo de que este se axuste ás necesidades que ten a nosa provincia”.
Deste xeito, as áreas das que se ocuparán os deputados do PP, axustándose ao acordo acadado polo Pleno o pasado 30 de xullo, son as seguintes:
Elena Candia (voceira) ocuparase de Xestión Territorial; Réxime Interior; Promoción do Territorio e Turismo. Javier Castiñeira (vicevoceiro) levará as áreas de Cooperación e Asistencia aos Concellos; Deportes, Artesanía e Deseño e Memoria Histórica; Cultura, Patrimonio Histórico e Artístico e Normalización Lingüística; e Formación, Ensino e Economía do Coñecemento. Pola súa banda, Agustín Baamonde (vicevoceiro) será o encargado de Participación Cidadá; e Medio Rural e do Mar. José Antonio García (vicevoceiro) estará á fronte de Promoción Económica e Social; e Economía, Recadación, Facenda e Especial de Contas; Medio Ambiente; e Recursos Sostibles. Por último, na área de Muller e Igualdade estará Lola Castro (deputada).
COMISIÓNS INFORMATIVAS
Polo que respecta ás dúas Comisións Informativas existentes na proposta aprobada, estas estarán integradas por tres membros do Grupo do PP. Na Comisión Xeral de Asuntos do Pleno estarán Francisco Balado Teijeiro, José Pardo Lombao, José Ángel Santos Sánchez.
Por outra banda, Dolores Castro Ochoa, José Jesús Novo Martínez e Pablo Taboada formarán parte da Comisión de Economía, Recadación, Facenda e Especial de Contas.
