O alcalde de Castroverde, José María Arias, aclarou que el non formará parte da nova executiva provincial do PSdeG de Lugo, que quedará conformada no congreso que se celebrará este sábado -día 27 de xullo-, porque a súa rival pola Secretaría Xeral, Patricia Otero, impúxose nas primarias e el concorría a ese proceso “cun proxecto diferente”.
“O que gañou, gañou“, dixo Arias, quen precisou tamén que a el lle toca agora “respectar as regras do xogo e ao partido”, porque “os militantes” elixiron a Patricia Otero e ao proxecto político que lles presentou.
Nese sentido, precisou que si estará “no comité provincial” e noutros “órganos do partido”, pero non na executiva, porque el concorreu ás primarias “cun proxecto diferente” ao que defendeu Patricia Otero e que foi referendado polo 67% dos votos da militancia. Este luns, Otero dixo que quería integrar a “outras sensibilidades” pero non contaba con Arias na Executiva porque xa declinara anteriormente o seu ofrecemento.
En todo caso, tamén deixou claro que estará “aí para arrimar o ombreiro” polo Partido Socialista, “con ela ou con quen estea” na Secretaría Xeral, como fixo “sempre”.
