O presidente da Deputación de Lugo, Darío Campos, anunciou este luns, tras a xunta de goberno, a firma dun convenio de “colaboración” entre a propia institución provincial e o Concello de Meira para o “centro de maiores” deste municipio, que recibirá uns 300.000 euros cada ano.
No convenio recóllese que “terán prioridade de acceso para as 30 prazas de residencia (de maiores) e 20 de centro de día, que ofrecen estas instalacións, en primeiro lugar, os veciños de Meira, seguidamente os da comarca da Terra Chá e despois os lucenses en xeral”.
“Para garantir a todos os maiores da provincia o acceso universal a estas prazas, a Deputación destinará cada ano uns 300.000 euros. De feito o convenio recolle un investimento total de 1,2 millóns de euros durante catro anos”, puntualizou.
Ademais, acordouse “destinar outros 32.000 euros para a dotación dun peche para o recinto do centro residencial de Meira”, sinalou o presidente provincial.
Darío Campos comentou que levan “semanas esperando a que o Partido Popular e o deputado non adscrito (Manuel Martínez que preside a sociedade do chan Suplusa) entreguen á Deputación o edificio e o resultado das obras do centro de Meira, que secuestran desde Suplusa, para avanzar na súa apertura”.
“Nós, mentres tanto, seguimos traballando desde a Deputación, aprobando este convenio e estes traballos e desde o Concello elaborando o regulamento e a ordenanza fiscal”, indicou.
PRESTACIÓNS
Así mesmo, asinouse este luns “o contrato para prestacións de asistencia básica, manutención e limpeza para o centro de maiores da Fonsagrada, dotado con 1,8 millóns de euros ata xuño de 2022”.
Na Fonsagrada, “25 maiores” deste concello “xa formalizaron a súa solicitude para entrar na residencia que está pendente de que a Xunta conceda o PIA para poder abrila”. “Un permiso que a Xunta demora desde hai anos, de feito en marzo entregouse máis documentación que nos pediron e seguimos á espera de resposta”, denunciou.
Sobre outras residencias, Campos concretou que na de Trabada hai “dez residentes, todos eles veciños de Trabada, e nos próximos días entrarán outros doce”.
