O Ministerio de Fomento licitou as obras do Centro de Visitantes na contorna do Castro en Castromaior, Portomarín (Lugo), segundo publica hoxe o Boletín Oficial do Estado (BOE), por 311.347 euros.

Estas obras inclúense no marco dun conxunto de actuacións que teñen como obxectivo principal a mellora do Camiño de Santiago ao seu paso por dez municipios das provincias da Coruña e Lugo.

As obras do Centro de Visitantes, que se expón como porta e invitación ao coñecemento e visita do castro de Castromaior, iniciaranse no outono de 2019 e prevese un prazo de execución de dezaoito meses.

Por outra banda, o BOE tamén anuncia a formalización de contratos para a recuperación do núcleo de Fonfría, no concello de Pedrafita do Cebreiro, segundo destacou este martes a subdelegada do Goberno na provincia, Isabel Rodríguez.