O conselleiro de Sanidade, Antonio Gómez Caamaño, presentou este venres en Lugo a nova Estratexia do Laboratorio de Saúde Pública de Galicia 2026-2030, un documento co que a Xunta pretende reforzar o papel deste centro como referencia no ámbito estatal da saúde pública.
Durante o acto, Gómez Caamaño destacou que a traxectoria e o prestixio do Laboratorio de Saúde Pública de Galicia avalan a candidatura de Lugo para acoller a futura Axencia Estatal de Saúde Pública, unha aspiración que, segundo sinalou, se sustenta na capacidade técnica e científica xa demostrada polo centro galego.
Segundo explicou o conselleiro, a nova estratexia fixa como obxectivos prioritarios mellorar a calidade e o alcance do rastrexo de mostras, reducir os tempos de resposta das análises e fortalecer a cooperación cos laboratorios de microbioloxía dos hospitais galegos. Neste marco, a Consellería de Sanidade impulsará a creación dunha rede estable de laboratorios que permitirá avanzar na secuenciación xenómica de virus e bacterias de interese sanitario, como a legionela ou a salmonela.
Gómez Caamaño puxo en valor o traballo que desenvolve o laboratorio en ámbitos como a seguridade alimentaria, o control da calidade das augas de consumo e de baño e a investigación de brotes de intoxicacións ou infeccións, funcións que definiu como esenciais dentro do sistema sanitario galego. Neste contexto, referiuse ao centro como “un dos buques insignia da sanidade galega”.
O conselleiro lembrou tamén que o Laboratorio de Saúde Pública de Galicia foi o primeiro destas características en España en obter o recoñecemento da Entidade Nacional de Acreditación (ENAC). Na actualidade, o centro conta cun equipo de 52 profesionais que procesan unha media anual de 15.500 mostras e realizan máis de 240.000 ensaios, dos cales preto do 70 % están acreditados.
Estas cifras, segundo destacou, reflicten a importancia estratéxica do laboratorio dentro do sistema sanitario galego. Nos últimos anos, a Xunta de Galicia destinou preto de cinco millóns de euros á súa modernización, incorporando equipamento de alta tecnoloxía que permitiu ampliar de maneira significativa a capacidade analítica do centro.
NOVAS LIÑAS DE TRABALLO E APERTURA Á SOCIEDADE
Grazas a este investimento, están a desenvolverse novas liñas de traballo no ámbito da saúde pública, entre elas a Rede de Ómicas, orientada á análise da incidencia e do xenotipado da legionela en Galicia, así como programas de biomonitorización humana destinados a avaliar a exposición da poboación a contaminantes en zonas concretas.
Gómez Caamaño pechou a súa intervención subliñando a vocación de apertura do laboratorio á sociedade, a través de programas de prácticas para estudantes e actividades divulgativas, co obxectivo de consolidar o seu papel como ferramenta clave para a prevención sanitaria e a protección da saúde ambiental e alimentaria en Galicia.
