Sete días despois de que os tractores concentrados na cidade de Lugo contra o acordo comercial da Unión Europea con Mercosur marchásense, os gandeiros volverán este xoves á rúa, xa que está prevista unha manifestación para as 12.30 horas que percorrerá, como en anteriores ocasións, o tramo comprendido entre a Delegación da Xunta e a Subdelegación do Goberno. Os organizadores confirmaron a presenza de tractores, polo que se esperan novamente complicacións de tráfico na Rolda da Muralla durante a concentración.

A marcha está convocada novamente por Agromuralla e Gandeiros Galegos da Suprema e ten como obxectivo final “a defensa do sector primario”. Os participantes concentraranse de novo a partir das 11.30 horas antes de iniciar a marcha a pé.

Hai unha semana, os gandeiros e agricultores que se concentraban en Lugo decidiron suspender as mobilizacións que mantiñan desde o 12 de xaneiro tras coñecerse a decisión do Parlamento Europeo de levar o acordo entre a Unión Europea e Mercosur ante o Tribunal de Xustiza da UE.

O pleno do Parlamento Europeo aprobou por unha axustada maioría denunciar o tratado ante o TJUE, ao existir dúbidas sobre o seu encaixe co dereito comunitario. A iniciativa saíu adiante por unha diferenza de apenas unha decena de votos e foi recibida con satisfacción polos manifestantes en Lugo, que aínda así agardaron varias horas antes de levantar a protesta.

Durante o dez días de protestas continuadas participaron preto de 180 tractores e a maioría deles permaneceron na cidade ocupando un dos dous carrís da Rolda. Nese tempo realizáronse concentracións todas as noites, varias marchas a pé e a posta en marcha dos tractores en varias ocasións, o que xerou numerosos problemas de tráfico. Nunha das primeiras xornadas sumouse o colectivo Elas Eles, e ese día queimáronse rulos de palla antes o tres institucións, Deputación, Xunta e Subdelegación de Goberno.

Os convocantes xa advertiron o último día de manifestación de que as mobilizacións poderían retomarse e esta é a primeira cita.