As obras da LU-P-2904, a vía que conecta Conturiz, desde a N-VI ata O Páramo coa vía provincial LU-P-4304, e na que a Deputación leva investidos preto de medio millón de euros, son xa unha realidade. As obras, que se iniciaron en abril, afectan ao tramo que vai do punto quilométrico 3,717 ao 9 e contaron cun investimento da Deputación de case 230.000€. Os traballos consistiron na pavimentación con aglomerado en quente, tras a reapertura de cunetas e o pintado mediante marcas reflexivas brancas.
O mandatario provincial sinalou a importancia destas obras pois “trátase dunha vía que dá servizo directo aos concellos de Lugo, O Corgo e O Páramo, que é moi empregada pola veciñanza, e que ten moito desgaste polo tránsito de vehículos agrícolas”.
Este proxecto súmase ao que adxudicou a institución provincial e que afectará ao tramo que vai de punto quilométrico 9 ao 13,4. A Deputación de Lugo adxudicou estas obras por algo máis de 200.000€. Precisamente, sobre esta infraestructura, o presidente da institución provincial, José Tomé destacou “o firme compromiso que se mantén coa mellora das vías provinciais”. Tamén sinalou que “máis do 21% dos Orzamentos deste ano van destinados a conservar, manter e mellorar a rede viaria provincial, a máis extensa de toda España con 4.217 quilómetros de lonxitude”.
CONEXIÓN ENTRE PARROQUIAS, PERSOAS E VECIÑOS
Precisamente, Tomé, acompañado hai unhas semanas polo alcalde de Lugo, Miguel Fernández, visitaron estas obras. O rexedor valorou a relevancia desta actuación para mellorar as comunicacións entre diferentes núcleos do rural de Lugo. “Esta estrada conecta Conturiz co Páramo, pero sobre todo conecta persoas, parroquias e servizos”, subliñou. Ademais, incidiu en que “as 54 parroquias que forman parte do noso municipio son unha prioridade para o Goberno local”.
O rexedor agradeceu a implicación da Deputación de Lugo neste obxectivo compartido e puxo en valor “a colaboración entre administracións, que é fundamental para acadar resultados concretos que melloren o benestar da cidadanía”. Finalmente, salientou tamén que esta mellora “permite reforzar a seguridade viaria, algo esencial para a tranquilidade dos usuarios e usuarias desta estrada”.
