A Conselleira de Vivenda e Planificación de Infraestruturas adxudicou por máis de 3.240.000 euros as obras de reforzo do firme na LU-113, ao seu paso polos municipios de Cospeito e Abadín, e na LU-530, por Lugo e de Castroverde.

Este contrato, adxudicado á empresa Construcións Isidro Otero, S.L., asinarase nos próximos días e o obxectivo é iniciar as obras durante o próximo mes de abril. O prazo de execución dos traballos estímase en seis meses.

Na estrada LU-113, intervirase nun tramo de algo máis de 12,6 quilómetros de lonxitude, entre os puntos 10+000 e 20+180, no municipio de Cospeito; e desde o punto quilométrico 20+180 ata o 22+780, xa no municipio de Abadín.

Na LU-530, actuarase nunha lonxitude total de 16,4 quilómetros. Neste caso, a intervención será no tramo que vai desde o quilómetro 3+600 ata o 12+640, no seu percorrido polo municipio de Lugo; e no tramo que continúa desde o punto 12+640 ata o 20, no municipio de Castroverde.

As actuacións teñen como obxectivo a rehabilitación localizada do firme mediante o fresado e a reposición da capa de rodaxe, co fin de mellorar as condicións de circulación nos diferentes tramos destas dúas estradas, completando as obras co repintado das marcas viarias.