Os concellos lucenses de Monterroso, Guntín, Antas de Ulla, Palas de Rei, Portomarín e Taboada decidiron crear unha agrupación enerxética para beneficiarse das axudas do Inega. Monterroso celebrou este luns o pleno extraordinario relativo ao contrato de subministración de enerxía eléctrica para as dependencias, instalacións e iluminación pública dos municipios que integran a agrupación.
A Corporación deu luz verde por unanimidade á aprobación do expediente de contratación, aprobación dos pregos de cláusulas administrativas particulares e de prescricións técnicas que rexerán o contrato e que constan no expediente. Estes municipios prevén contratar a subministración de enerxía eléctrica para as dependencias, instalacións e iluminación pública mediante procedemento aberto suxeito á regulación harmonizada para un servizo de prestación obrigatoria para todos os municipios.
Previamente, estes seis concellos asinaron en xaneiro de 2024 un convenio de colaboración para a solicitude conxunta dunha subvención á Xunta de Galicia para a planificación enerxética da agrupación enerxética de concellos para o ano en curso. A agrupación resultou beneficiaria por resolución do INEGA con data de marzo de 2024. Así, o INEGA concedeu unha axuda do 100 % para cada un dos concellos para elaborar un estudo estratéxico para a subministración enerxética de cada entidade local, onde se detectan as carencias da subministración, excesos ou defectos de potencia contratada, xeoreferenciación de persoais eléctricos, estudo de necesidades, así como as propostas de mellora.
Tendo en conta estes datos, a agrupación dos seis concellos sacará a licitación a subministración de enerxía eléctrica para todos en conxunto. Trátase, explican, “de licitar a subministración eléctrica en conxunto para conseguir unhas condicións máis vantaxosas”. No convenio de colaboración acordouse que o representante administrativo da agrupación enerxética de concellos fose o Concello de Guntín, tanto para os trámites da subvención, como da licitación de contratos enerxéticos.
