A sección primeira da Sala do Contencioso-Administrativo do Tribunal Superior de Xustiza de Galicia (TSXG) estima parcialmente o recurso presentado da CIG nun fallo no que anula os servizos mínimos decretados pola Xunta para a folga de limpeza na provincia de Lugo de 2023.
Nunha sentenza con data de 10 de xullo de 2024, o alto tribunal galego falla que foron “desproporcionados” os servizos mínimos fixados en centros sociocomunitarios como os da Milagrosa e Ribadeo, do mesmo xeito que en centros de maiores como os das Gándaras e Monfortes, así como a Casa do Mar de Celeiro, entre outros exemplos.
O TSXG razoa que “non se explica nin xustifica a razón do establecemento de tales servizos mínimos, que tampouco se ofrecen como proporcionados”, polo que se vulneraron os dereitos fundamentais dos traballadores.
Respecto diso, a representante da CIG-Servizos, Asunción Castiñeira, lembra que o sindicato recorreu a orde da Vicepresidencia Primeira e Consellaría de Presidencia porque “impedía ás traballadoras exercer o seu dereito á huelgaa” ao establecer en moitos casos un 100% de servizos mínimos.
Agora, a CIG pide á Xunta que “tome boa nota” da sentenza e estableza servizos mínimos axustados aos dereitos dos traballadores para o futuro. Tamén se queixa da “inacción” do Goberno galego durante o tempo que durou a folga, “negándose a intervir e asumir as súas responsabilidades como administración e como principal contratista dos servizos de limpeza” e “mirando para outro lado”.
