Eixo Atlántico mantivo en Madrid un encontro co secretario xeral de Infraestruturas, José Javier Izquierdo Roncero, no que constatouse o desigual avance na modernización do ferrocarril Lugo-Ourense. Malia que as obras de electrificación avanzan segundo o previsto, non hai prazos na planificación das variantes imprescindibles para a mellora nos tempos de viaxe.
A delegación do Eixo Atlántico, na que estaban presentes o presidente Alfredo García, secretario xeral Xoán Vázquez Mao e mailo rexedor monfortino José Tomé, considera esta falta de información un agravio comparativo. Roncero, alegando que os prazos do anterior Goberno eran “irreais”, negouse a dar unha data firme para a saída a exposición pública do estudo informativo das variantes dos Peares-Canabal e Monforte-Rubián.
Estas variantes son fundamentais para o tren Lugo-Ourense. Trala insistencia dos representantes do Eixo, o secretario xeral comprometeuse a trasladar a data antes de Nadal. Sirva a comparativa: o exministro Íñigo de la Serna afirmara que o estudo sería público en outubro, coa previsión de iniciar as licitacións no verán de 2019.
Como primeiro paso, a electrificación da liña servirá para actualizar o servizo de media distancia. Isto permitirá que unha unidade da Alta Velocidade se separe en Ourense e poida chegar a Lugo, sen necesidade de que os usuarios cambien de tren.
Conectando Lugo por autovía
A parte máis positiva da xuntanza foi a pronta licitación de novos treitos da A-76. Esta conexión constituirá a primeira autovía que vertebre o interior de Galicia, pois o espazo Lugo-Ourense constitúe a única zona pola que aínda non se pode circular por unha autovía.
A delegación pediu alternativas para axilizar o nexo en Monforte, coa perspectiva de mellorar a conexión ate Ourense, e que non se vexa afectada pola previsible declaración da Ribeira Sacra como Patrimonio da Humanidade pola Unesco.
Adif evita detallar os prazos para a chegada da Alta Velocidade a Lugo
