O delegado do Goberno en Galicia, Pedro Blanco, referiuse este luns ás obras de conservación e rehabilitación das dúas infraestruturas danadas na autovía A-6 ao seu paso pola provincia de Lugo e confirmou que o viaduto do Castro, clave nas comunicacións de Galicia coa meseta, estará aberto “a finais de ano en dirección Madrid e o ano que vén en dirección A Coruña”.

As declaracións producíronse un día despois de que representantes do PP de Galicia e León mantivesen un encontro para solicitar ao Goberno de maneira conxunta a elaboración dun plan extraordinario e integral de conservación da vía. “Este Goberno está a investir máis de 360 millóns de euros nas estradas de toda Galicia”, proclamou Pedro Blanco, para acto seguido asegurar que o Executivo non se atopa de brazos cruzados: “Está a traballarse nas dúas infraestruturas da provincia e tamén no mantemento. Dígoo porque dá a sensación de que facemos pero non mantemos. Este Goberno fai e mantén“, indicou.

Blanco, que lembrou que o noiro derrubado na A-6 á altura de Becerreá xa cedera noutra ocasión, cando gobernaban, dixo, “os mesmos que na xornada de onte xuntábanse para pedirnos responsabilidades”, confirmou que continúan “as obras de limpeza” da devandita infraestrutura danada. “Este é o primeiro goberno que inviste semellante cantidade de diñeiro en obras de conservación”, reiterou, antes de defender a xestión que desde o Goberno central está a levarse a cabo na autovía. “A responsabilidade en todo caso é un problema fundamentalmente técnico pero nós o que facemos é reaccionar de maneira inmediata”, finalizou.