O deputado de Formación, Ensino e Economía do Coñecemento da Deputación de Lugo, Miguel Fernández, participou este luns na apertura do 52º Seminario de Técnicos e Especialistas en Horticultura, no que participan 30 profesionais e que conta co apoio da institución provincial.
Miguel Fernández destacou a importancia deste encontro para “intercambiar coñecementos e mellorar as infraestruturas e as formas de investigación”, e tamén puxo en valor o “compromiso” da Deputación con esta actividade e co sector primario en xeral, con iniciativas como a posta a disposición da cidadanía de maneira gratuíta dos hortos urbanos do Rato.
Na apertura do seminario, que se celebra na Escola Politécnica Superior do Campus Terra, participaron tamén o coordinador das xornadas, Benigno Ruiz Nogueiras; o coordinador nacional do encontro, Sotero Molina; o subdirector da Axencia Galega de Calidade Alimentaria (AGACAL), Manuel López Luances; deputados provinciais e concelleiros.
Este seminario reúne en Lugo a máis de 30 especialistas en horticultura de toda España, e servirá para presentar os resultados das últimas investigacións e experimentacións realizadas neste ámbito. O obxectivo do encontro é transferir o coñecemento xerado para conseguir produtos de calidade, e garantir un futuro sustentable e rendible para o sector hortofrutícola.
