Os sindicatos CC.OO., CIG e UGT, que representan ao “95% dos máis de 5.000 traballadores do sector do metal na provincia de Lugo”, anunciaron mobilizacións ante a “falta de sensibilidade” da patronal na negociación do convenio.
A este sector, aseguraron, pertencen tamén outros subsectores como o de reparación de vehículos, reparación de maquinaria agrícola, carpintaría metálica, servizo de ascensores, calefactores e fontaneiros, refrixeración industrial, montaxes eléctricas e telefónicas, electricidade de casas, fábricas de fabricación e reparación ou venda de electrodomésticos, entre outros.
Segundo aseguran o tres sindicatos nun comunicado, as negociacións para sacar adiante o novo convenio esténdense desde o 20 de xaneiro de 2022, cando se constituíu a comisión negociadora.
Ata o momento celebráronse doce reunións, pero o pasado 28 de febreiro, tal e como explican, a patronal negouse a que os traballadores poidan percibir atrasos durante a vixencia do convenio (2022-2025), ademais de “non aceptar que se aplique a cláusula de revisión salarial ano a ano con efectos retroactivos”.
Doutra banda, os sindicatos denuncian que a patronal non asumiu “ningunha reivindicación que levaron á mesa de negociación”, por exemplo, “o plus de traballo a quendas, complemento de IT pola base de cotización, permisos para acompañamento de fillos menores e familiares convivientes, melloras salariais para non perder a maiores poder adquisitivo con respecto a outras provincias limítrofes, entre outras.
