A nova planta de Cafés Candelas en Lugo foi declarada pola Xunta como iniciativa empresarial prioritaria, figura que simplifica os trámites administrativos a proxectos declarados de interese pola Administración autonómica.
A declaración recibiu luz verde no Consello da Xunta deste xoves, celebrado en Pontevedra. Esta figura, contemplada na Lei de simplificación adminsitrativa de Galicia, reduce á metade os prazos de tramitación dos proxectos.
A compañía cafeteira prevé investir 14 millóns de euros na posta en marcha dunha nova planta que se levantará no polígono das Gándaras, en Lugo. O proxecto desenvolverase nunha parcela de 18.000 metros cadrados na que se construirá unha nave de 9.900 metros cadrados que permitirá triplicar a capacidade produtiva da empresa.
Por outra banda, na súa reunión semanal, o Executivo galego autorizou a transferencia ao Concello da Coruña da estrada AC-415 –avenida de Fisterra desde a rolda de Outeiro a Meicende– e dun tramo de 160 metros da AC-211.
