A empresa láctea Tegestacín, que ocupa as antigas instalacións de Leite Pascual no concello lugués de Outeiro de Rei, ten paralizada a súa actividade desde o pasado venres 4 de marzo. Así o denunciou o responsable da Federación de Alimentación da Confederación Intersindical Galega (CIG), Cristián López, quen incidiu este martes que a “a paralización da actividade xa é completa”.

Os traballadores inciden en que a interrupción “total” da actividade “vén acompañado da falta de pagamento de salarios”, algo que, segundo remarca López, “é xa marca da casa”. López quéixase que o de Tegestacín “é a historia do quero pero non podo” polos “incumprimentos graves contra os dereitos dos traballadores e contra todas as garantías salariais”.

“Aqueles despedimentos que se anunciaba para o 12 de febreiro acabáronse concretando oito días máis tarde do previsto e á marxe dos pasos que se tiñan que materializar”, remarcou. Tegestacín chegou a contar con máis de 70 traballadores, que máis tarde pasaron a 40 e despois a 18 máis. Agora, desde a CIG, estiman que tan só quedan “tres” operarios que, auguran, tamén terán que abandonar as instalacións da empresa en Outeiro de Rei.