A CIG denunciou que a dirección da empresa Tegestacín atrasou de forma “unilateral” a primeira reunión para negociar o ERE extintivo que a compañía planea realizar na súa factoría láctea de Outeiro de Rei.
A través dun comunicado, o sindicato asegura que este luns estaba prevista a primeira reunión do período de consultas do ERE pero que o encontro foi posposto “unilateralmente” pola empresa.
As partes foron convocadas de novo para a xornada do martes, un xesto que a CIG interpreta como unha “falta de respecto” e unha mostra da “pouca seriedade” da empresa que xestiona a antiga planta de Leites Pascual en Outeiro.
O peche de planta afectaría aos 70 empregados que traballan na factoría e que este luns recibiron o apoio do rexedor de Outeiro de Rei, José Pardo.
