Máis da metade dos orzamentos da Deputación de Lugo para 2022 irán destinados a políticas sociais –uns 34 millóns de euros– e ao ‘Plan Único’, o proxecto de investimentos para os 67 concellos da provincia –21,5 millóns–. Así o detallou este luns en rolda de prensa o presidente, o socialista José Tomé, acompañado pola vicepresidenta, a nacionalista Maite Ferreiro, e pola responsable de Economía da institución provincial, Mayra García.
O proxecto de orzamentos para o próximo exercicio, que irán ao pleno ordinario do próximo martes, 30 de novembro, ascenden a un total de 100.165.599,49 euros. As contas experimentan unha subida de 7,7 millóns con respecto a 2021, fundamentalmente porque crecen en máis de 6 millóns as achegas do Estado.
Tomé destacou que “son os máis altos da última década“, ao ser uns orzamentos “claramente investidores e claramente sociais, porque o aumento se produce fundamentalmente nos capítulos de investimentos, de transferencia de capital, en gastos de bens e servizos e de benestar”.
“Son uns orzamentos feitos desde o rigor, por un goberno que é sólido, estable –de coalición de PSOE e BNG–. Un goberno que ten un proxecto común e claro para a provincia de Lugo”, resumiu o presidente. En base a todo isto, asegurou que se reforzarán “as políticas sociais, a cooperación cos concellos, o apoio aos sectores produtivos e a mellora da mobilidade”.
AS POLÍTICAS SOCIAIS, “MÁIS DUN TERZO”
O presidente provincial insistiu en subliñar que “en políticas sociais, para o ano 2022, subirase o investimento nun 12% ata alcanzar os 34 millóns de euros, que fai que estas medidas “ocupen máis dun terzo do total” das contas.
“Falamos de políticas sociais, de benestar, de atención ás persoas maiores, de igualdade, de cultura, de deporte, de mocidade, de memoria histórica, de educación e tamén de emprego. En definitiva, do que preocupa á sociedade lucense”, debullou.
AS RESIDENCIAS, CASE 10 MILLÓNS
Tomé puxo especial acento nas residencias para maiores, “que pasan dunha consignación de 8 millóns de euros a case 10, o que representa unha subida dun 20%”. Nesta liña asegurou que “se segue ampliando a rede pública” destas instalacións, lembrando que cando se iniciou o mandato estaban abertas tres –Trabada, Ribadeo e Pol– e desde ese momento outras tres –A Fonsagrada, Castroverde e Pedrafita–. A estas hai que sumar a apertura da de Meira o vindeiro xoves, mentres que en febreiro de 2022 empezará a operar a de Navia de Suarna e, en xuño, a de Ribas do Sil.
Con respecto aos centros de maiores, o presidente resaltou que se conseguiu dar emprego a 200 persoas, “un 95% son mulleres”; á vez que afeou á Xunta que non achegue “nada” para ditas residencias e que non construíse ningunha na provincia nos últimos anos.
