Agromuralla recuperará as tractoradas cunha protesta o 4 de novembro en Lugo para esixir prezos xustos para o leite nun contexto de suba de custos de produción. A protesta comezará ás 12,00 horas ante o edificio administrativo da Xunta en Lugo e transcorrerá por varias rúas ata acabar ante a Subdelegación do Goberno.
Así, reclama medidas “urxentes” que compensen a “suba desmesurada” de pensos, luz e gasóleo que sofren as explotacións galegas. Agromuralla sinala que agrupa a centos de gandeiros de Lugo e A Coruña.
“Este ano, desde o mes de xaneiro, o que nos custa producir disparouse, coas subas actuais no recibo da luz e o gasóleo e o incremento que se está dando no penso e nas materias primas, pero o que nos pagan polo leite non se moveu e non nos dá para pagar os gastos, polo que estamos a perder diñeiro todos os meses”, explica o presidente de Agromuralla, José Luís Pérez Barreiro.
Deste xeito, volveranse celebrar tractoradas reivindicativas tal e como sucedeu en 2015, cando Agromuralla protagonizou en Lugo protestas durante varios días polos baixos prezos do leite.
REUNIÓN DO SLG ESTE XOVES
Pola súa banda, o Sindicato Labrego convocou unha reunión do sector lácteo este xoves, 28 de outubro, en Lugo para valorar posibles accións reivindicativas a realizar ante os baixos prezos. Este encontro farase baixo o lema ‘Nin prezos nin PAC’ na Casa Sindical de 11,00 a 14,00 horas.
Denuncia que os prezos que reciben os gandeiros galegos polo leite –32,7 céntimos o litro en agosto– seguen á cola do Estado, onde a media se sitúa en 33,8 céntimos.
Deste xeito, o Sindicato Labrego calcula que as granxas galegas perden sobre 10 millóns de euros ao ano por non cubrir custos de produción. De feito, entre agosto de 2020 e 2021 desapareceron en Galicia 317 granxas.
