O responsable do sector de gandaría extensiva de Unións Agrarias, José Ramón González, denunciou que as explotacións de carne nesta provincia acumulan “perdas de ingresos de contorna a 14 céntimos por quilo” con respecto a 2019.

Ademais, constatou que, desde hai dous anos, “produciuse unha subida nos custos de produción de 59 céntimos”. González Rodríguez apuntou que “isto fai que cada explotación cobre entre 160 e 180 euros menos do que gañaba en 2019”, un período que “xa presentaba unha situación difícil porque leva vendendo ao mesmo prezo que hai 20 anos”.

“A situación é perigosa, non só falamos de perdas económicas, que son importantes desde logo, senón tamén de perda de xestión do territorio”, advertiu. Así, afirmou que na provincia de Lugo “sobreviven” entre “5.500 e 6.000 explotacións de carne”, con “unha cabana gandeira de 115.000 vacas abastecedoras”.

“Isto carrexa na provincia, por mor da crise da covid-19 e por mor da situación que pasan os gandeiros, que se deixaron de ingresar con respecto a 2019 máis de 12 millóns de euros”, estimou José Ramón González.

Así as cousas, Unións Agrarias anunciou unha acción de protesta para o vindeiro venres en Santiago, onde se demandará que a Xunta poña en marcha “as axudas covid-19”, prohiba tamén vendas a “perdas” e “evitar monopolios”.