O presidente da Asociación Provincial de Empresarios de Hostalaría de Lugo, Cheché Real, celebrou as axudas avanzadas este xoves pola Xunta para o lecer nocturno, pero advertiu que “non é a panacea” porque non evitarán “as perdas”.
Así o manifestou Real o día despois da reunión por videoconferencia do vicepresidente primeiro da Xunta, Alfonso Rueda, e do director xeral de Emerxencias e Interior, Santiago Villanueva, cos representantes do sector.
O presidente dos hostaleiros lucenses lembrou que levan “tres meses buscando axudas”, pero saudou que esta liña específica para o lecer nocturno “vai ser unha repartición o máis xusto posible” para uns negocios que “levan catro meses pechados”.
En principio, a Xunta consignará 2 millóns de euros para 600 establecementos, o que significa “un primeiro paso”. “Non é a panacea. Non vai ser o que nos quitará das perdas no lecer nocturno, pero hai que aplicar aquilo de paxaro en man”, sentenciou Cheché Real. E é que, segundo incidiu, isto “pode ser o principio doutras axudas que poidan vir” e que “en 15 ou 20 días” poderían xa concretarse máis pormenorizadamente.
Sobre todo, destacou que ditas axudas poden axudar a remediar o problema que se expón co pago dos alugueres: “Isto é un saco sen fondo, porque non tes ingresos de ningún tipo e o aluguer téñeno que seguir pagando aínda que cheguemos a unha negociación (co propietario) e vas ter que seguir pagando unha serie de taxas e seguros sociais”.
“A cuestión é que non poden ter ningún ingreso, porque están pechado por unha orde ministerial”, concluíu o empresario lucense.
