O Eixo Atlántico do Noroeste Peninsular remitiu un escrito ao presidente do Goberno, Pedro Sánchez, para trasladarlle a súa solicitude para que os concellos participen na xestión, atribución e programación dos fondos europeos destinados a atenuar a crise económica.
Este organismo, do que é vicepresidenta a alcaldesa de Lugo, Lara Méndez, agrupa 34 concellos de Galicia e o norte de Portugal. O pasado 29 de maio celebrou unha Comisión Executiva, froito da cal xurdiu esta petición que agora comunican ao Goberno. “Os concellos somos os que mellor coñecemos o noso tecido produtivo local e cales son os sectores que verdadeiramente necesitan esas axudas”, explican. O “estreito” e “permanente contacto” que manteñen con eles é fundamental, aseguran, para xestionar de maneira eficaz a inxección de diñeiro que estes precisan.
Neste sentido, engaden outra cuestión a ter en conta: “Preocúpanos que os fondos para a recuperación estean maioritariamente destinados a subsidiar, en detrimento da inversión produtiva que xera actividade económica”. Por iso, o Eixo aposta por darlles máis peso a autónomos e pequenos empresarios á hora de beneficiarse destas axudas.
Do mesmo xeito, solicitan unha boa coordinación entre os Executivos de España e Portugal para atender as cuestións que afectan aos territorios da fronteira e “optimizar a eficiencia” dos recursos dun e doutro país para “evitar duplicidades que impedirían o aproveitamento dos fondos para unha verdadeira reconstrución económica”.