A Confederación de Empresarios de Lugo (CEL) valora a posta en marcha de medidas por parte do Goberno central con motivo da crise polo coronavirus, pero apela ás administracións da Xunta e locais para implementar máis propostas.

Nun comunicado, móstrase a favor das medidas económicas e sociais do Goberno, aínda que entende que este é un paquete de urxencia inmediata e que “se lanzarán novas medidas froito do diálogo social”. Así mesmo, reclama a implicación das administracións autonómica e local para cubrir demandas de empresas e autónomos que “quedaron fóra do regulado a nivel estatal”.

Sinala que, “nestes momentos, aquelas empresas que non poidan expor un ERTE por forza maior, pero teñan comprometida e mermada a súa actividade pola situación, deberán expor procesos de suspensión de emprego por causas económicas sen que polo momento poidan acollerse á suspensión das cotizacións á Seguridade Social, co evidente prexuízo que isto pode causar a un bo número de negocios”.

AUTÓNOMOS

Respecto dos autónomos, as medidas habilitadas cobren algunhas das demandas, pero “queda aínda unha ampla casuística que implicará desproteccións“. Por iso, demanda a suspensión da cotización dos autónomos e doutras obrigacións de pago ás administracións, como taxas e impostos de enerxía, entre outras. Cre que neste caso “poden ter un papel decisivo” a Xunta de Galicia e administracións locais a través duns paquetes de medidas que cubran estas cuestións.

MEDIDAS ANUNCIADAS POLO CONCELLO

O Concello de Lugo xa anunciara uns días unha liña de axudas dirixidas ás pemes e aos autónomos, á que destinarán cinco millóns de euros. Hoxe mesmo asinaron un decreto mediante o cal se pretende garantir que as concesionarias municipais non teñan que recorren a ERTEs e despedimentos.