O director do Igape, Juan Cividanes, destacou este xoves en Vilalba que a especialización profesional e a retención do talento dos mozos en Galicia son “claves” no impulso da competitividade do tecido industrial galego e no fomento da Industria 4.0.

Así o dixo durante unha visita ás instalacións de Pelé Design and Retail, unha das 85 pemes que recibirán as axudas do programa Profesionais 4.0, destinado a promover a contratación de titulados universitarios e de técnicos superiores en FP de ata 35 anos.

Esta iniciativa servirá, segundo Cividanes, para impulsar a especialización e o acceso ao mundo laboral de 160 persoas xoves e tituladas hai pouco tempo. Dotada con dous millóns de euros, a nova liña de axudas incentiva a contratación e a formación destes profesionais por parte das empresas para a realización de plans de competitividade no campo da Industria 4.0.

As propostas de mellora desenvolveranse en áreas como a optimización financeira, a profesionalización da produción e a cadea loxística, o desenvolvemento de procesos e sistemas de xestión da calidade, a identificación e posta en marcha de redes de cooperación e socios, a aposta polo capital humano, o asesoramento integral ao proceso emprendedor, a dixitalización ou creación de contidos dixitais e a incorporación efectiva de tecnoloxía, entre outros.