A Xunta de Goberno da Deputación de Lugo acordou este venres incorporarse como membro institucional á Rede de Destinos Turísticos Intelixentes, un ente de ámbito estatal que está coordinado pola Secretaría de Estado de Turismo.
A portavoz do goberno socialista, Pilar García Porto, explicou que “se trata dunha adhesión que non supón ningún compromiso económico” pero que consideran que “repercutirá positivamente na chegada de visitantes” á provincia, facendo de Lugo “un destino moito máis atractivo”.
García Porto insistiu na importancia que ten para a Deputación de Lugo formar parte desta rede, que “ten como obxectivo impulsar a innovación e a tecnoloxía no ámbito do turismo en España e contribuír desta maneira a que os destinos sexan máis competitivos”.
Dentro deste ámbito, mencionou as iniciativas que se están pondo en marcha, como a implantación dun sistema de información turística intelixente, a través de plataformas que estarán dispoñibles en diferentes dispositivos portátiles.
Ademais, “este tipo de accións están a completarse coa instalación dunha rede de sinalización turística intelixente nos Concellos adheridos”, unha forma de “achegar aos visitantes a información turística relevante dunha maneira innovadora”, explicou García Porto.
“Con estas accións iniciais, evidenciamos que temos un claro interese por apostar e empregar o uso das novas tecnoloxías como ferramenta de consolidación do turismo no territorio. Son unhas actuacións que queremos que se vexan potenciadas grazas a esta integración dentro da Rede de Destinos Turísticos Intelixentes”, resolveu.
A día de hoxe forman parte desta Rede de Destinos Turísticos Intelixentes 73 lugares de España, dos cales cinco están en Galicia (concellos de Ourense, Sanxenxo e Vilagarcía de Arousa e Deputacións de Pontevedra e de Ourense).
