A Feira do Queixo na Ulloa é máis que queixo. Este certame abarcou na XXVI edición os sectores máis representativos da zona, ofrecendo diversas actividades e demostracións de gran interese para os veciños e turistas. Así, amáis da promoción deste queixo con Denominación de Orixe e do sobranceiro pan da comarca, houbo espazo para o sector agroindustrial e da artesanía. E, como novidade, tivo lugar o acto de creación da Encomenda do Queixo, asociación formada por comendadores que teñen entre os seus obxectivos fomentar e difundir o recoñecemento do queixo da Ulloa e dar a coñecer as súas cualidades en tódalas súas vertentes.
Logo do pregón oficiado polo presidente do Parlamento de Galicia, Miguel Santalices, seguiu o acto de nomeamento dos comendadores: José Manuel Balseiro, delegado da Xunta en Lugo; Ánxeles Vázquez, conselleira de Medio Rural; María Varela, cociñeira e propietaria de Parada das Bestas; Juan Carlos Corredoira, árbitro; Jesús Quintá, polo seu labor en Alibos e no mundo rural; a empresa Cartografía e Medicións, ubicada en Palas de Rei; o alcalde de Monterroso, Miguel Rico, impulsor do certame; e o propio Santalices.
Asemade foron entregados os premios aos hostaleiros gañadores do concurso de tapas con queixo da Ulloa, celebrado o venres e o sábado anteriores, e no que participaron un total de trece establecementos hosteleiros. O primeiro dos premios foi para albergue “Buen Camino”, pola súa tapa “ Coral Marino”; o segundo recibiuno Pulpería A nosa Terra, por a “Tosta da Ulloa con marmelada de tomate e aceite de oliva”; e o terceiro premio foi para a “Minihamburguesa” do bar Obelix.
