Unha decena de efectivos do corpo de Bombeiros de Lugo acudiu este xoves ao pleno do Concello para protestar pola falta de efectivos neste servizo, que vive unha “situación caótica”.

Os traballadores facían corredor ao equipo de goberno socialista de Lugo con pancartas nas que se podían ler lemas como ‘Bombeiros de Lugo sen xefaturas, únicos de España sen organigrama’ ou ‘Estrutura organigrama profesional, por mérito e capacidade’.

Un dos portavoces do colectivo, Manuel López, alertou de que “cada vez” son menos efectivos, “porque agora hai dous máis de baixa”, o que implica que, a día de hoxe, están “operativos 31 bombeiros”. “É unha situación caótica”, clamou.

Así, e aínda que hai en marcha un proceso de selección “de doce prazas”, este portavoz do colectivo advertiu de que a situación empeorará proximamente, dado que “agora se van  xubilar dous –efectivos– máis”.

Manuel López explicou que “hai días en que só hai catro bombeiros de servizo”. “Un tense que quedar ao teléfono, outro conduce e só dous quedarían para un incendio”, puxo como exemplo.

Neste sentido, fixo fincapé en que este déficit nun persoal que, no seu momento, chegou a contar con 54 bombeiros, supón un “claro risco” de seguridade.