O Club Deportivo Lugo empatou na súa visita ao Real Oviedo (1-1).
Os oviedistas foron claramente superiores na primeira metade. No minuto dez, Juan Carlos Martín, porteiro do Lugo, parou un un para un contra Yoel Bárcenas. O Oviedo dominou a práctica totalidade da primeira metade. Pese a iso, no minuto 27, os lucenses puideron adiantarse despois dun saque en longo do propio Juan Carlos Martín, xogada individual notable de Toni Martínez, que cede a Cristian Herrera, quen asistiu a José Carlos Lazo para o seu disparo lixeiramente cruzado. Catro minutos despois, Sergio Tejera marcou para o Oviedo cun zurdazo dende a media lúa da área grande. O seu disparo toca en Miguel Vieira e troca a dirección.
Na segunda metade, mesmo denominador: dominio do Oviedo até o treito final. No minuto 53, Toni Martínez recuperou un balón e o seu disparo foi desviado por Nereo Champagne, porteiro local. Un par de minutos despois, Fernando Seoane remataba alto ao borde da área. Alberto Monteagudo introducía a Manu Barreiro e Juan Muñiz por Toni Martínez e Cristian Herrera. No ecuador da segunda metade, Juan Carlos despexaba un contragolpe veloz do Oviedo. O Lugo cometía excesivos erros na tenencia do balón. Os oviedistas puideron marcar o segundo nun cabezazo de Christian Fernández Bolaño no minuto 80 e nunha xogada individual de Omar Ramos parou Juan Carlos no man a man no minuto 88. O Lugo mellorou dende aí. Juan Muñiz disparou unha falta directa que desviou Champagne e empatou cun cabezazo de Miguel Viera na xogada seguinte nun saque de esquina botado por Muñiz no minuto 90.
Os lucenses son decimoitavos con 28 puntos. Na vindeira xornada, sumarán tres puntos pola vitoria administrativa ante o Reus Deportiu, expulsado de La Liga.
