A Xunta de Galicia espera licitar en xaneiro de 2025 a obra de reforma do estadio Anxo Carro de Lugo, para a que destinará case 3 millóns de euros, coa idea de poder comezar os traballos en xuño. Precisamente o secretario xeral para o Deporte, José Ramón Lete Lasa, acompañado polo presidente de Club Deportivo Lugo, Tino Saqués, visitou este luns o campo, despois de que se asinase o contrato de redacción do proxecto de reforma o pasado luns, día 20 de maio.
Hoxe, tras a reunión mantida entre representantes da Xunta, o equipo redactor e o club, enviouse ao Concello o anteproxecto, para que os técnicos municipais poidan avaliar aspectos técnicos mentres se redacta o proxecto definitivo. A previsión é que en setembro a Xunta pedirá a licenza de obra ao goberno local, tras dispor xa do proxecto redactado, co obxectivo de empezar os traballos “canto antes”, licitándose en xaneiro. “A idea é ter o contrato asinado en maio e comezar en xuño a obra, sempre que se conte coa licenza municipal”, engadiu a Xunta nun comunicado.
