O obxectivo é consolidar un grupo de persoas que adestren semanalmente e sentar as bases para formar un equipo cunha actividade regular e continuada, que permita aproveitar os beneficios do deporte para as persoas, tanto no plano físico como emocional e social.
Os adestramentos comezarán o vindeiro 10 de marzo no Complexo Deportivo de Frigsa –de 11:30 a 13:00–. Dirixiranos Ángel Nadela e Karols Szluc, xogador do Abeconsa Basketmi de Ferrol que, durante a presentación do proxecto, relatou a súa propia experiencia.
O deportista polaco destacou que o baloncesto permite que as persoas que teñen que empregar cadeiras de rodas acaden maior autonomía en actividades cotiás e xenera vínculos que axudan a que aquelas que perden mobilidade por accidentes ou enfermidades se adapten ás novas circunstancias.
O deputado de Deportes Efrén Castro saudou a iniciativa que “amplía o acceso ao deporte en Lugo e aproveita a experiencia que teñen cidades como Ferrol para sacar adiante este tipo de proxectos deportivos, que melloran a vida das persoas e reforzan a sociedade no seu conxunto”.
As persoas interesadas en participar na actividade poden anotarse a través dun formulario electrónico dispoñible na web da Fundación Breogán. O equipo facilitará as cadeiras de rodas deportivas e o material necesario para os adestramentos.
