O alcalde de Pol, o socialista Lino Rodríguez, foi condenado polo Xulgado de Instrución Número 2 de Lugo, por agredir a un mozo durante un partido de fútbol no municipio. A pena, tras acharlle culpable dun delito de lesións leves, é dunha multa de 540 euros e unha indemnización para o mozo de 120 euros.
Os feitos xulgados o pasado mes de setembro remóntanse ao pasado 8 de maio, durante o partido de fútbol entre o Pol e o Portomarín, onde ambos os equipos se xogaban o ascenso a Rexional Preferente. O agredido, Brais Rodríguez, é afeccionado do Portomarín e acudiu a Pol xunto cuns amigos, subíndose a unha especie de plataforma para animar ao seu equipo usando un bombo.
O alcalde reprochoulle esta actuación e, tras unha advertencia previa na que o rexedor lle pediu que se baixase da estrutura na que estaba co bombo, produciuse unha lea.
O REXEDOR NON RECORRERÁ
No seu día, Brais Rodríguez relatou que o rexedor colleuno polo pescozo e ameazouno. Este admitiu que o agarrou pola cinta do bombo para facer que se desprazase, pero negou calquera agresión.
Agora o xulgado condénao por lesións leves e o rexedor avanzou que non recorrerá, á vez que defende que el se limitou a acutar como “autoridade” para desautorizar a actitude dos afeccionados do Portomarín.
AGREDIDO
O afeccionado do Club Deportivo Portomarín Brais Rodríguez agredido polo alcalde sinalou que a sentenza por lesións leves “parécelle xusta” e que quería era “que se demostrase que dicía a verdade porque el negaba todo” polo que o diñeiro “era o que menos lle importaba”. “Ningún personaxe público ou calquera outra persoa debería de ter esa reacción por ningún motivo”, dixo.
PP PIDE MEDIDAS: “NON ESTÁ Á ALTURA DO CARGO”
Por outra banda, o PP de Pol instou aos socialistas a tomar “as medidas oportunas” tras coñecerse a condena ao alcalde do municipio, xa que consideran que “non está á altura do seu cargo” e mostran o seu rexeitamento ante a “actitude altiva” de Lino Rodríguez que se menciona na propia sentenza. Ademais, recalcaron que este tipo de comportamentos “son habituais no rexedor municipal”.
