O Club Deportivo Lugo sumou un punto despois de empatar fronte o R.C.D. Mallorca (1-1) nun partido no que foi moi superior ao comezo, pero dende aí o encontro foi perdendo o ritmo e o Mallorca foi mellorando e dominando progresivamente.
Ao pouco de comezar, Carlos Pita abriu un balón cara Serge Leuko, que centra e desvía a defensa mallorquina. No minuto 4, combinación entre Pita e Cristian Herrera, que Pita finaliza a gol cun disparo seco e axustado dende fóra do área para marcar o 1-0. Segundo gol do mediocentro en dúas xornadas. Apenas dous minutos despois, Miguel Vieira perde un duelo aéreo e “Josete” Malagón crúzase ante Lago Júnior, que conducía cara a portería de Juan Carlos Martín. Ao cuarto de hora, centro perigoso do extremo dereito visitante Aridai. No ecuador da primeira metade, o mediocentro do Mallorca Salva Sevilla disparou alto despois dun saque de esquina. Reaccionou o Lugo cun contragolpe de Cristian Herrera, que supera a un rival, centra e Jean Marie Dongou puido marcar o 2-0, mais o seu golpeo foi excesivamente cruzado. No minuto 37, Serge Leuko, profundo e sen sofrer defensivamente, foi cambiado por previsible rotura do tendón de Aquiles da dúa perna dereita. No minuto 38, Herrera foi novamente protagonista cun golpeo que desvía a zaga visitante a saque de esquina. En cambio, Aridai puido marcar o 1-1 cunha falta directa ao longueiro dende a banda esquerda. Un par de minutos despois, o 1-1 cun golazo do lateral dereito visitante Fran Gámez, que recolle un balón, recorta cara a esquerda e golpea coa súa perna zurda, a menos hábil, ao segundo pau. Así chegaba o descanso.
Na segunda parte, comezou mellor o Mallorca. Así, Salva Sevilla disparou ao poste nun disparo moi similar ao do gol de Carlos Pita e dende a mesma zona. O lateral esquerdo Salva Ruiz produciu moito neste treito da segunda metade, ata ser cambiado por lesión no minuto 80. No minuto 63, paradón de Juan Carlos Martín a disparo de Salva Sevilla nunha falta directa. Cinco minutos despois, centro perigoso de Salva Ruiz e o seu homólogo local Vasyl Kravets despexou a saque de esquina en boca de gol. José Carlos Lazo, que entrou no minuto 61, creou perigo nas dúas opcións que tivo dende a banda, no minuto 74 e 75. Dende aí ao final, pouca profundidade de ámbolos dous equipos. Un centro de Fran Gámez no minuto 78 ao que non chega Merveil Ndockyt.
