O Durán Maquinaria Ensino Lugo, que competirá a vindeira tempada en Liga Día, máxima categoría do baloncesto español, confirmou a renovación da base Sara Cuiña López. A xogadora, de 24 anos e 1.69 metros de estatura, cumprirá a súa sétima tempada no club e compatiblizará a primeira plantilla e o equipo sénior autonómico. Chegou procedente do C.B. Pontumio, onde se formou. Toda a súa carreira sénior estase a desenvolver no Ensino. É a quinta renovación do equipo presidido por Manuel Durán polo de agora.
A pasada tempada en Liga Feminina 2, a base de Pontedeume promediou 4.1 puntos, 1.9 rebotes, 1.2 asistencias e 1 recuperación en 13’40” por partido.
Segundo o club, Sara Cuiña destaca no “tiro exterior, a capacidade de sacrificio polo ben do grupo e a habilidade para iniciar o xogo ofensivo a gran velocidade”.
