O dianteiro lucense Uxío da Pena marcou un gol co primeiro equipo do Real Club Deportivo da Coruña na vitoria deportivista fronte o Bergantiños F.C. en As Eiróas (0-3). Anotou o segundo gol do equipo dun fermoso cabezazo a centro de Carles Gil no minuto 70. O lucense renovou co Fabril por unha tempada máis despois de marcar 11 goles a pasada campaña en Segunda División B sendo o máximo goleador do equipo na súa primeira experiencia na categoría.
Uxío da Pena afirmou que “calquera deportivista e xogador do filial morre de gañas de xogar no Deportivo” e recoñeceu que está “aproveitando e desfrutando un pouco a situación”.
O punta lucense, de 27 anos, foi o máximo goleador do grupo un da Terceira División na tempada 2016-2017 con 27 goles anotados no Centro Cultural e Deportivo Cerceda. Marcou 45 goles en 81 partidos co Cerceda entre 2014 e 2017 en Terceira División.
