O adestrador coruñés Óscar Lata é o novo segundo adestrador do Club Baloncesto Breogán para a vindeira tempada en Liga ACB. A súa última experiencia profesional foi no Fútbol Club Barcelona a pasada campaña xunto a Sito Alonso até febreiro. Lata substitúe a Quique Fraga, novo director deportivo do club breoganista, no rol de segundo técnico. O primeiro adestrador será Natxo Lezkano por terceiro campionato correlativo.
A súa traxectoria profesional comeza en 1992, con apenas 18 anos, no Club Deportivo Estación da Coruña. Cómpre subliñar que entre 2009 e 2011 traballa nas prestixiosas categorías inferiores do Joventut de Badalona. Dende 2014, traballou como adestrador axudante de Sito Alonso: entre 2014 e 2016 no Bilbao Basket, na tempada 2016-2017 en Baskonia e a citada pasada campaña no Barça. Xa traballara con Alonso durante catro cursos co C.B. Monzón.
