A capital lucense acollerá mañá, mércores 4 de novembro, o inicio da decimocuarta etapa da Volta Ciclista a España 2020. O tramo previsto, de algo máis de 200 quilómetros, percorrerá Lugo, probará un anaco de Pontevedra e rematará en Ourense.

Os ciclistas sairán de Lugo cara a Guntín, Monterroso e Antas de Ulla. Cambiarán de provincia para dirixirse ata Agolada, Lalín e Rodeiro, e logo volverán a terreos lucenses, onde pasarán por Chantada, subirán ao Alto de Escairón e irán ata Monforte de Lemos. Finalmente poñerán rumbo á capital ourensá, fin da etapa.

RÚAS CORTADAS

Por mor deste acontecemento, o Concello de Lugo estableceu un plan de tráfico específico para ordenar a circulación na cidade ante os cortes de rúas.

A proba pasará pola Avenida de Madrid (rúa das Artes-Fonte do Rei), a Fonte do Rei, Avenida de Ramón Ferreiro, Avenida Ángel López Pérez, a praza da Constitución, a Ronda da Muralla (ata a praza de Bispo Odoario), a rúa Germán Alonso, a Fonte dos Ranchos e a Avenida das Américas. O final do tramo urbano conecta coa LU-540).