EFE.- Os futbolistas do CD Lugo tamén se ven afectados polo illamento, froito da pandemia do coronavirus. Coas competicións deportivas en pausa e coa prohibición de saír ao exterior, vense obrigados a buscaren outras maneiras de manterse en forma. Por iso, o club publicou nas redes sociais un vídeo de exercicios deseñados polo preparador físico do primeiro equipo, Pepe Pons, para que os xogadores poidan adestrar mentres respectan o confinamento.
O conxunto galego exhibe unha serie de tarefas que se poden realizar nos domicilios e avogou por “adaptalas á condición física” de cada persoa, tamén dos seareiros. “Os preparadores físicos do Lugo queren axudarvos a facer deporte estes días e mantervos en forma”, apunta o club.
📹🧘🏻♀️🏋🏻♀️ | Los preparadores físicos del #CDLugo quieren ayudaros a hacer deporte estos días y manteneros en forma❤️🤍. Hoy le toca a @Pep_Pons, preparador físico del 1er equipo.
Mañana ➕ No olvidéis adaptarlo a vuestra condición física.#YoMeQuedoEnCasa#QuédateEnCasa pic.twitter.com/Gmx5kpswvt
— Club Deportivo Lugo (@CDeportivoLugo) March 18, 2020
DJALÓ: “EU AMAÑO CO SALÓN DA MIÑA CASA”
O central Marcelo Djaló explicou que tanto el coma os seus compañeiros seguen un “plan específico de exercicios” que lles proporcionaron os técnicos. En declaracións ao club, manifestou que o enxeño se fai necesario para futbolistas que non teñen “as mansións con ximnasio ou sala de máquinas, como poden ter os xogadores dos grandes clubs do mundo“. “O importante é seguir a rajatabla o que nos pediron. Eu amaño co salón da miña casa e o material que nos proporcionou o club para manterme en forma”, sinalou.
AO TELÉFONO COS COMPAÑEIROS
Ademais recoñeceu que tamén pasa bastante tempo ao teléfono cos seus compañeiros, “sobre todo con Leuko” e co seu veciño Roberto Canella, ao que ve pasear ao can, do mesmo xeito que fai el de cando en vez para sacar “por necesidade” á súa golden retriever.
Tamén segue a dieta da nutricionista “para tentar que este parón se note o menos posible”. Polas tardes afronta “outra sesión de traballo no salón de casa”, sempre “pendente das noticias que van saíndo”.
“SER UN EQUIPO” PARA FREAR O VIRUS
O central branquivermello considerou que “a mellor ‘defensa’ para frear este virus é ser un equipo e quedar na casa”. Ademais, lamentou que “o parón chegase neste momento da tempada” no que o equipo estaba nunha “dinámica positiva”, aínda que deixou claro que “o primeiro é a saúde e estar máis unidos que nunca en algo que é unha catástrofe mundial”. EFE
