A alcaldesa de Lugo, Elena Candia, recibiu hoxe na Casa do Concello á organización e aos participantes do Lugo Music Festival ’26, que celebra estes días a súa quinta edición coa participación duns 150 músicos, na súa maioría lucenses, entre profesionais e novos talentos.
Na recepción participaron entre outros o director artístico desta edición, Cristóbal Soler, vinculado durante unha década ao Teatro de la Zarzuela e actual director da Banda Municipal de Valencia, así como integrantes do comité organizador e directores participantes procedentes de diferentes puntos de España, Bruxelas, Londres e Ucraína.
O festival combina música clásica, tradicional, jazz e outros estilos populares con formación e competición. A edición deste ano incorporou como novidade a Praza Maior como escenario inaugural, onde onte se celebrou o primeiro concerto do festival a cargo da Banda Sinfónica, nunha actuación que contou cunha gran acollida por parte do público e que permitiu levar por primeira vez a apertura do certame a un espazo emblemático da cidade.
A programación continúa
Esta mércores, ás 20:00 horas, o Círculo das Artes acollerá un recital de solistas con Gerald Vázquez, ao piano, clarinete e arpa, e Iria Estévez, como voz.
Mañá, xoves 20, ás 20:00 horas, a Praza Maior será escenario do concerto do Ensemble Xuvenil de Ventos, coa participación de Tabea Graser.
O venres 21, tamén ás 20:00 horas, o festival trasladarase ao Círculo das Artes, con Tabea Graser e novo repertorio, acompañada polo Grupo de Corda e Piano.
A clausura será o sábado 22, ás 20:00 horas, no Círculo das Artes, cun concerto do Grupo de Corda e Piano, a final do V Curso-Concurso de Dirección Musical, unha mostra de swing con Nati & Jose Swing e a intervención do saxofonista Kike López.
A programación complétase con ensaios abertos de mércores a venres, que permiten ao público coñecer de preto o traballo previo dos músicos.
