O director xeral de Cultura, Anxo M. Lorenzo, e o director do Festival Outono Fotográfico, Xosé Lois Vázquez, presentaron este martes no CGAC as bases do XII Premio Galicia de Fotografía Contemporánea, un galardón que “promove” novas creacións artísticas.
Este galardón impúlsao a Xunta de Galicia, a Asociación Outono Fotográfico e a Deputación de Lugo. No acto de presentación, o representante da Consellería de Cultura, Lingua e Xuventude sinalou que o certame “constitúe unha plataforma na que poder utilizar linguaxes fotográficas actuais e así dar a coñecer o traballo dos artistas”.
Neste sentido, puxo en valor este tipo de iniciativas que promoven a difusión das artes e que “ofrecen visibilidade a todo tipo de creadores”. O certame está dotado cun único premio que consiste na edición dun libro e na produción dunha exposición temporal que se inaugurará en Lugo e que itinerará durante dous anos.
Anxo Lorenzo lembrou que as exposicións que se han ido realizando no marco desta iniciativa xa percorreron diferentes puntos tanto de Galicia como do resto da Península Ibérica. Os interesados en participar deberán enviar a súa solicitude entre o 24 de xullo ata o 15 de setembro deste ano.
Só poderanse enviar proxectos realizados entre setembro de 2014 e setembro de 2024, e que non fosen subvencionados ou recibisen unha bolsa na súa totalidade anteriormente noutro certame, nin editado na súa totalidade en calquera soporte. Respecto ao tema e á técnica, terán total liberdade.
