O Ourense Film Festival (OUFF) entregou na XXIII edición un total de 17 galardóns, adicando a mención especial á lucense Tódalas mulleres que coñezo, de Xiana do Teixeiro. Na gala triunfaron Mug (Mellor Película), Capharnaüm (Premio do Xurado e Premio do Público) e La mujer de la montaña (Mellor Dirección), mentres que o galardón honorífico foi para Mabel Rivera, intérprete de Mar Adentro e a mítica serie Pratos Combinados.
O xurado presidido por María Bardem concedeu dúas mencións especiais, a Cría puercos e a Tódalas mulleres que coñezo. Esta produción lucense, un documental sobre a violencia machista e a apropiación que fai do espazo público, ten a particularidade de que foi filmada por un equipo exclusivamente de mulleres.
Tódalas mulleres que coñezo fora unha das protagonistas da Semana Internacional de Cine de Autor de Lugo, e con anterioridade pasara polas seccións oficiais de DocumentaMadrid –onde acadou o Premio Screenly á mellor longametraxe– ou Vigo –premio do público na mesma categoría–, entre outras.
O documental recolle as voces de mulleres de distintas xeracións, e entre todas retratan o abismo de xénero que supón para elas moverse polo espazo público. A primeira longametraxe de Xiana do Teixeiro —Somos Plaga, Carretera de una sola dirección— tenta desmontar o mito da igualdade de xénero, explorando o alcance da cultura da violación. A produción corresponde a Walkie Talkie Films, coa participación da Axencia Galega das Industrias Culturais (AGADIC).
