A alcaldesa de Lugo, Lara Méndez, valorou a repercusión “moi positiva” do Caudal Fest, que se celebrou este fin de semana na capital lucense, e avanzou que a próxima edición será os días 20 e 21 de setembro de 2024. Así, destacou que esta quinta edición, “a máis concorrida da historia”, mostra que se trata dun evento “en continua progresión”. Ademais, puxo en valor a figura dos ‘caudals’, que estivo “por encima das expectativas”.
“Esa actitude mostrada pola xente, que demostrou ante todo que viña gozar da cultura e da música, estivo por encima da climatoloxía. Nin a auga embazou nin un só momento do Caudal Fest”, apuntou. Á espera de datos oficiais, a alcaldesa asegurou que este Caudal Fest vai ter “un retorno importantísimo” na cidade. “Falamos de que en 2022 foron 30.000 as persoas que pasaron polo Caudal, mentres que este ano a cifra de asistentes sitúase en 35.000“, relatou.
Por tanto, segundo a súa valoración, se na pasada edición a estimación valorada do retorno económico estaba en 4,5 millóns de euros, prevese “un incremento importante dese impacto”. Nesta liña, insistiu na repercusión “moi positiva” para Lugo deste “terceiro grande evento da cidade”, para o que xa avanzou as datas da súa sexta edición: 20 e 21 de setembro de 2024. “Animamos xa a todo o mundo a que reserve esas datas para vir a Lugo a gozar da música, da cultura e da xente”, concluíu.
