O presidente da Deputación de Lugo, José Tomé Roca, asinou co alcalde de Meira, Antonio de Dios Álvarez, un convenio de colaboración por valor de 106.455 euros para a rehabilitación e acondicionamento das instalacións do antigo bar ‘Centro’ para convertelo nun novo espazo de dinamización cultural do municipio e a comarca.

A institución provincial destina 99.800 euros e o Concello a contía restante, 6.655, para este proxecto que consiste en crear un espazo polivalente onde celebrar actuacións, concertos, reunións, conferencias, exposicións e calquera evento ou acto cultural.

O local está nun edificio situado no centro neurálxico do municipio, no paseo central da praza Maior, onde se aglutina a vida comercial e lúdica da localidade e en cuxo contorna ten lugar a feira quincenal.

Esta nova colaboración económica da Deputación de Lugo en Meira sumar, entre outras, ao investimento de case tres millóns de euros que recibiu este Concello no presente mandato a través do Plan Único de Cooperación cos municipios para mellora de estradas, creación de emprego e colaboración co tecido asociativo da localidade.