A asociación cultural Xermolos, comprometida coa tradición e cultura do noso pobo, vén organizando dende o 1980 o Festival de Pardiñas, un encontro que ten como fío condutor a música folk e tradicional galega e doutros lugares do mundo. Paralelamente organízanse moitas máis actividades, algunhas con carácter previo á fin de semana grande, neste caso os días 6 e 7 de agosto, e outras que se desenvolven no transcurso da mesma.
Salientar a importante Mostra de Artesáns de Instrumentos de Música Tradicional, que este ano chega á XXIX edición, ou a de Artesanía, que festexa a súa XLIII edición. O pregoeiro destas dúas mostras será Xerardo Fernández Santomé que falará o sábado ás 17:00 h.
Outras actividades paralelas a salientar este ano son, por exemplo, o ‘V Aberto de Billarda’ o sábado ás 16:00 h. e grazas á implicación do Varal Liga Nacional de Billarda (LNB), a Carreira Popular –sábado 9 ás 19:00 h.–, un obradoiro de baile tradicional e un espectáculo infantil con Abracadáver –domingo 7 ás 16:30 h.–
O pregoeiro do Festival de Pardiñas deste ano será o activista cultural e escritor Séchu Sende, que segundo nos dixo é para el unha honra inmensa, “Para min é algo impresionante e a responsabilidade é moita”, dixo. Respecto ao pregón non quixo desvelar nada e non quedará outra que asistir ao mesmo o domingo ás 19:00 h.
CONCERTOS
O sábado 6 actuará pola mañá Xirifeiros e a partir das 22:00 h. Comando Curuxás e Ruxe-Ruxe como representantes de Galiza, No Reply dende Madrid, e Fourth Moon chegados de Escocia.
O domingo 7 pola tardiña, ás 18:00 h. actuarán as Pandereteiras Ultreia e a partires das 20:30 h. Carapaus, Tandub e Festicultores representando a Galiza e Xabi Aburruzaga chegado de Euskadi.
