A festa de recreación histórica do pasado castrexo e romano de Lugo, o Arde Lucus, celebrará a súa edición número 21 entre o 9 e o 12 de xuño con máis de 400 actividades, entre elas o concerto de Tanxugueiras.
A festa, que arrincará co aceso do lume sacro de Vesta e a entrada das lexións para tomar a cidade, estenderase ata os días 12 con circo romano, co encontro tamén de tropas romanas con castrexas ou vodas celtas, ademais de actuacións. Tamén haberá un espectáculo de realidade aumentada na Mosqueira, que será pioneiro en Galicia e co que se recreará a época de esplendor de Lugo no século I.
A alcaldesa de Lugo, Lara Méndez, presentou esta nova edición, acompañada de membros das 19 asociacións que participan activamente (nove romanas e dez castrexas) no Arde Lucus. Valora que sen o traballo destas entidades non sería posible realizar esta festa de recreación histórica que reúne milleiros de persoas na cidade da muralla.
“As asociacións son a ‘alma mater’ deste Arde Lucus e volvemos con todo o esplendor de actividades, con máis de 400”, subliñou Méndez.
RECUPERAR A NORMALIDADE
Previamente, Lara Méndez afirmou: “Estamos ante unha cita moi importante porque recuperamos a normalidade, e recuperaremos o Arde Lucus no seu esplendor”.
Ademais, puntualizaba que se está nunha “etapa moi ilusionante” no camiño de conseguir “o distintivo de Festa de Interese Turístico Internacional e é onde focalizamos os esforzos nos dous últimos anos (antes da pandemia)”, expresou.
“Pomos o foco na internacionalización da festa para que este ano demos ese paso último para pola no mapa internacional”, dixo. O Concello de Lugo destinará para o Arde Lucus deste ano case 140.000 euros.
