A concelleira de Cultura, Turismo e Promoción da Lingua, Maite Ferreiro, presentou xunto con representantes da asociación FaCeLa, a sexta edición do festival FaCeLa Fest, o festival de música independente “made in Lugo” que conta coa colaboración das áreas de Cultura do Concello e da Deputación. 

O FaCeLa Fest volverá este ano ás datas habituais de antes da pandemia, celebrándose entre o 12 e o 14 de maio. O escenario principal volverá ser o exterior do Auditorio Municipal Gustavo Freire, que acollerá o festival os días 13 e 14 de maio, e contará con máis actividades gratuítas en distintas zonas da cidade, entre as que se atopan un dobre concerto que se celebrará no Club Clavicémbalo o xoves 12 e unha sesión vermú que terá lugar na praza da Milagrosa.

O cartel deste ano volverá apostar por bandas míticas da escena independente, entre as que se atopan as británicas The Wedding Present, procedentes de Leeds, que levan dignificando o indie-rock de guitarras desde os anos 80, e Wave Pictures, que chegarán ao FaCeLa Fest desde Londres cunhas letras onde o sentido do humor e as súas melodías destacaron no xénero durante os 20 anos de traxectoria do grupo. “Trátanse dúas apostas de gran calidade dentro do xénero, que demostran que este festival aposta pola calidade musical das distintas agrupacións”, afirmou Maite Ferreiro.

A escena internacional do festival complétase con The Mastersons + the Whitemore Sisters, unha banda de Country alternativa americana procedente de Brooklin e cos portugueses Eigreen, unha banda de recente creación e de gran calidade.

No tocante ás agrupacións estatais, destacan os galegos Triángulo de Amor Bizarro, que contan cun dos directos máis apaixoantes do panorama independente a nivel estatal, e que contan cun gran número de premios. Completan a selección os madrileños Los Punsetes, e Hinds, unha das bandas españolas máis valoradas a nivel internacional.

Estarán presentes tamén os barceloneses Stay, os vascos Lie Detectors ou o grupo madrileño Cosmen, que xunto cos ferroláns Bang 74 completarán a selección do sexto FaCeLa Fest. No tocante ás agrupacións locais, contarase con catro agrupacións de calidade, como son Kike Ganso, Filophóbicas, Terror Erótico Adolescente e Nebra. A programación do FaCeLa Fest completarase con sesións de DJ.