Lugo acollerá desde este martes unha exposición composta por 40 fotografías que percorren o sistema planetario dun modo científico e artístico.
Segundo detallou Fundación LaCaixa, promotora da iniciativa en colaboración co Concello, a mostra ‘Outros mundos. Viaxe polo sistema solar da man de Michael Benson‘ está conformada por instantáneas de gran formato que foron seleccionadas e procesadas polo cineasta, artista e escritor norteamericano.
En concreto, a exposición, cuxo desenvolvemento se enmarca no acordo entre a fundación e a Xunta para o Xacobeo 2021, poderá visitarse desde este martes ás 11,00 horas na praza Maior de Lugo.
Para confeccionar a mostra, Benson elixiu e tratou imaxes orixinais en branco e negro captadas en distintas misións planetarias polas principais axencias espaciais, ademais de compor mosaicos en cor.
Deste xeito, permítese realizar unha viaxe ao sistema solar a través de fotografías tomadas durante seis décadas de exploración robotizada. Así, a Fundación La Caixa aspira a aproximar a ciencia e a cultura á cidadanía fóra dos museos e salas de exposicións.
