A caravana da segunda edición do festival ‘Camiño Escena Norte’ parará este domingo en Lugo, no Auditorio Municipal Gustavo Freire, coa obra ‘Talvez Soñar’, da compañía cántabra Fío Producións.

Tal e como informa a organización, a función será ás 20,30 horas e as entradas son gratuítas, previa retirada a través da web www.entradaslugo.es.

A obra ‘Talvez soñar’, que xa foi representada este sábado en Mondoñedo, é unha “lúdica exploración do universo feminino” de William Shakespeare a través das súas soadas obras ‘Hamlet’, ‘Otelo’ e ‘O mercador de Venecia’.

Tras a deste domingo, o ‘Camiño Escena Norte’ levará a outros municipios lucenses distintas representacións. A próxima será ‘A loka historia de Frankenstein’, da asturiana ACAR Teatro do Mundo, que se representará o vindeiro venres, 25 de setembro, en Ribadeo.