A cidade de Lugo estreará un servizo de autocine a partir de xuño coa programación dunha serie de proxeccións no aparcadoiro do Pazo Universitario de Deportes.

A concelleira de Cultura da cidade, Maite Ferreiro, deu a coñecer a noticia este sábado, que forma parte dunha iniciativa para devolver a cultura “á rúa” e soster a “animación na cidade mantendo a actividade dos grupos e artistas locais” no verán.

Para poder cumprir coas limitacións e protocolos de seguridade, os espectáculos públicos tiveron que ser modificados en moitos casos, por iso a idea do autocine é unha das propostas “máis novas da programación”.

Segundo precisou o concello nun comunicado, a iniciativa levará a cabo coa área de cultura da Deputación e as proxeccións percorrerán outros municipios da provincia, aínda que as primeiras realizaranse na cidade da muralla.

A idea é colocar unha pantalla led de grandes dimensións no Pazo Universitario de Deportes e o son chegará ao interior dos vehículos pola radio do propio coche a través dunha frecuencia FM que se activa para ese efecto. Ademais, o concello comunicou que para entrar no recinto será preciso solicitar unha invitación “para evitar atascos e que acuda un número de vehículos superior á capacidade do autocine”.