Un xornal autoxestionado, o novo proxecto de prensa local en Lugo

Unha campaña de micromecenado busca financiación para botar a andar Pensa Lugo, un medio de comunicación cuxos eixes son o feminismo, a ecoloxía e a inclusión. Nacido ao abeiro do movemento asociativo, tratará temas que quedan á marxe dos medios convencionais.

Ilustración coa que se presenta Pensa Lugo, un novo xornal nacido na cidade.

Pensa Lugo é o nome dun novo medio de comunicación para a cidade e a súa contorna. Trátase dun xornal xurdido ao abeiro do movemento asociativo lucense e que procura ser autoxestionado. Por iso, as súas creadoras veñen de poñer en marcha unha campaña de micromecenado que lles permita non depender de subvencións institucionais.

“Pensamos que é posible crear un novo medio sen intereses económicos, que dea voz aos sectores máis silenciados”, explican. Entre eses ámbitos máis agochados, destacan a cultura local e o deporte feminino de Lugo, por exemplo, cuestións ás que han prestar atención neste novo proxecto.

Un xornalismo pausado baseado no feminismo, a ecoloxía e a inclusión. Esa é a idea sobre a que xirará Pensa Lugo, que se publicará bimensualmente, aínda que a súa intención é ir acurtando esa periodicidade. O obxectivo é afondar naqueles asuntos que quedan á marxe nos medios convencionais, ben pola temática ou ben polas esixencias da inmediatez informativa.  Ademais de publicar estes contidos en papel, tamén prevén facelo nunha páxina web.

DEIXAR UN COMENTARIO

Please enter your comment!
Please enter your name here