A concelleira de Cultura, Maite Ferreiro, anunciou este mércores o segundo concerto confirmado para o San Froilán 2019. Será o da cantante portuguesa Dulce Pontes, que traerá a música lusa ao Domingo das Mozas.
A artista portuguesa Dulce Pontes, que xa estivera no San Froilán do 2004, pechará a programación desa xornada. Coñecida internacionalmente como unha das mellores artistas lusas, conta xa con 30 anos de carreira musical ás súas costas. No ano 1991, foi a gañadora do Festival Nacional da Canción de Portugal. Ademias, dise que os seus traballos contribuíron de xeito importante ao renacemento do fado nos 90 e, actualmente, conta con dez álbums publicados, ademais de varias colaboracións.
Será quen poña broche a un Domingo das Mozas que estará especialmente dedicado ás mulleres, segundo explicou Maite Ferreiro. Por iso, prevé que todas as actuacións teñan protagonismo feminino.
MÚSICA TRADICIONAL
Outro dos eixes principais destas festas será a música tradicional, tal como indiciou a concelleira de Cultura. “As agrupacións de música tradicional contarán tamén, durante estas festas, con espazos propios na programación”, afirmou.
